جاده‌کان ئه‌ڵێی ریخۆڵه‌ی بزنن. به‌سه حاکمان  ئیتر مه‌‌دزن!  

 جاده‌کانمان ئه‌ڵێی ریخۆڵه‌ی بزنن.... لێپرسراوان وه‌ک خه‌ڵکی ناژین.. وڵات غه‌رقی فه‌سادی ئیدارییه‌...هتد ئه‌مانه‌ ئه‌و ئیعترافه‌ بچووکانه‌ی یه‌کێتییه‌ له‌ به‌رنامه‌ی رای گشتی شه‌وی ١٩/٢٠ ی ٩ ی ٢٠٠٥ له‌ که‌ناڵی کوردساته‌وه‌!

وه‌ک ده‌ڵێن ئه‌م ماسته‌ی کوردسات به‌دیارییه‌وه‌ دانیشتوه‌ که‌ هه‌وێن بێت بێ موو نیه‌! ئه‌وان باش ده‌زانن که‌ خۆێان وڵاتێان نوقمی فه‌سادی ئیداری و سه‌رگه‌ردانی کردووه‌؛ ده‌زانن که‌ که‌س نه‌ماوه‌ له‌ حه‌مله‌ی تاڵان و بڕۆیی و داگیرکیرنی مال و زه‌ویی خه‌ڵکی ئه‌وان ئاگادار نه‌بێت؛ چاک ده‌زانن که‌ جامی تووڕه‌یی خه‌ڵکی لیوا و لێو لێیده‌ڕژێت و خه‌ڵکی هاتۆته‌ سه‌رجادده‌ لێیان! زۆر باش ده‌زانن و کاکی پێشکه‌شکه‌ری به‌رنامه‌که‌ی کوردساتیش ئه‌و ئیعترافه‌ ده‌کات: که‌ ئیتر ئه‌فسانه‌ی( حکوماتی ساوا) که‌س به‌ فلسێکی قه‌ڵب نایکڕێت و ده‌وری به‌سه‌ر چوو! به‌ڵام بۆ رووسپی کردنه‌وه‌ی ده‌سته‌ڵاته‌که‌یان و خۆڵکردنه‌ چاوی خه‌ڵکی که‌وتوونه‌ته‌ سازدانی به‌رنامه‌ی له‌م چه‌شنه‌. هه‌روه‌ها یه‌كێک له‌ ئامانجه‌کانی تری ئه‌م به‌رنامه‌یه‌ فه‌زڵ فرۆشتنه‌ به‌سه‌ر خه‌ڵکیدا که‌ ئه‌وان لایه‌نگری دیموکراتین و ره‌خنه‌ له‌ خۆیان ده‌گرن و میکرۆفۆنیش ئازادانه‌ ده‌ده‌نه‌ ده‌ست خه‌ڵکی تاکوو ره‌خنه‌یان لێبگرێت! ده‌بوو پێش سازدانی ئه‌و به‌رنامه‌ییه‌ ئه‌و پرسیاره‌یان له‌ خۆیان بکرداییه‌: گه‌ر عه‌یاری دیموکریتی ئه‌وان‌ له‌ ٢٤ تێپه‌ری کردووه‌؛ بۆچی دوای هه‌موو خه‌ڵی له‌سه‌ر ئه‌و مه‌سه‌لانه‌ هاتنه‌ قسه‌! بۆچی جورئه‌تیان نه‌کرد و گۆشه‌یه‌کی بچووکی ئه‌و ناڕه‌زایه‌تیانه‌ له‌ تێڤێ که‌یان نیشان ‌بده‌ن؛ بۆ چی رایه‌کی ئه‌و خه‌ڵکه‌ و نوێنه‌ره‌کانیان وه‌رنه‌گرت؟!   

 ئه‌م ئیعترافه بچووکانه‌ی رای گشتی جه‌نده‌ له‌گه‌ڵ قسه‌که‌ی جه‌لال تاڵه‌بانی،دێته‌وه‌ که‌ گوایه‌ رۆژنامه‌ نووسێک که‌ سه‌ردانی کوردستانی کردووه‌ و ته‌نیا جیاوازییه‌ک که‌ شکی بردووه‌ له‌ نیوان سلیمانی و ئه‌ورووپادا: ئه‌وه‌ بووه‌ که‌ له‌ سلێمانی خه‌ڵکی به‌ کوردی قسه‌ ده‌که‌ن!

رای گشتی، سه‌ره‌ڕای ئیعترافه‌کانی که‌ به‌ ناچاری ده‌یکات؛ به‌گێک داده‌نێ و ده‌که‌وێته‌ هه‌ڵدان به‌باڵای دیموکراتی حکومه‌ته‌که‌یی وتاوانه‌که‌ ده‌خاته‌ ملی مه‌قاول، که‌سانی هه‌لپه‌رست و نه‌زان، و زۆر به‌ ناچاری هاتنه‌ سه‌رجادده‌ی خه‌ڵکی به‌ جۆرێک به‌ به‌رهه‌ق له‌ قه‌ڵه‌م ده‌دات! گه‌ر ده‌تان زانی ئه‌م داوایه‌ی خه‌ڵکی به‌ر هه‌قه‌؛ بۆچی ته‌واوی داواکارییه‌کانی ئه‌و خه‌ڵکه‌تان به‌ ده‌ستڕێژی پۆلیس و ئاساییشه‌که‌تان وه‌ڵام دایه‌وه‌، گه‌ر داوای ئه‌و خه‌ڵکه‌تان به‌ به‌رهه‌ق ده‌زانی  بۆچی ئیمزای حیزبه‌ مووچه‌خۆره‌کانی ژێر باڵتان کۆکرده‌وه‌ له‌ دژی جه‌ماوه‌ری که‌لار و خۆپێشاندانه‌که‌تان به‌ نا دیمووکراتی و گێره‌شێوێنی دایه‌ قه‌ڵه‌م؟

گه‌ر به‌لای رای گشتییه‌‌وه‌؛ یه‌کێتی و حکوموته‌که‌ی باشن، باشتره‌ ئه‌م پرسیاره‌ له‌ خۆیان بکه‌ن: حیزبێک ده‌کرێت باش بێت، کام یه‌ک له‌ ده‌سته‌ڵاتداره‌کانی ده‌گریت که‌ بڕبڕه‌ی پشتی حیزبه‌که‌ی پێکهێنابێ؛ که‌ سه‌رماییه‌کی گه‌وره‌ی مۆڵ نه‌دابێت (مه‌له‌فه‌کانیشیان له‌ولاوه‌ بووه‌ستێت)‌؟ که‌س هه‌یه‌ ته‌نانه‌ت بزانێت مووچه‌ و ده‌خلی سکرتێری گشتی و مه‌سووله‌ گه‌وره‌کانی بزانێت؟ هه‌رگیز بووه‌ قوماشێکی باشت له‌ خورییه‌کی خراپ و بێکه‌ڵک چنگ بکه‌وێت؟!

 کوردستان بۆ ده‌سته‌ڵاتدارانی یه‌کێتی و پارتی ئه‌وروپا و جه‌ننه‌تول مه‌ئوایه‌، به‌ڵام بۆ خه‌ڵکانی گه‌ڕه‌که‌کانی کانی سپیکه‌ و قالاوه‌ و ئابڵاخ، شوێنێکی تره که‌ ئینسان شه‌رم ده‌یگرێت بڵێ له‌و شوێنه‌ ده‌ژیم‌!

له‌ راستیدا، قسه‌ له‌سه‌ر ئه‌م مۆدێله‌ عه‌جیبه‌ی دیموکراتی بۆ تاڵان و بڕۆیی زۆره‌، ئه‌وه‌نده‌ ماوه‌ که‌ روویه‌ک له‌ خۆیی و رای گشتێیه‌‌که‌ی وه‌رگێرین و روو له‌و خه‌ڵکه‌ به‌شمه‌ینه‌ته بکه‌ین و‌ بڵیین: نانی ده‌می مناڵه‌کانتان له‌ ده‌می ئه‌و شێره‌دایه‌ که‌  هه‌ر رۆژه‌ی به‌ بیانووی له‌ جه‌شنی سه‌ری به‌رز بۆ مووچه‌ نه‌وی مه‌که‌ن، حکوومه‌ته‌که‌مان ساوایه‌، با هه‌ڵبژاردن بکرێت و با ده‌ستوور دابنرێت؛ لووش ده‌درێت، گرێنتی به‌ده‌ستهێنانی داواکانتان سه‌رجادده‌کان و هه‌ڵبڕینی ده‌نگی به‌ر هه‌قتانه‌! هه‌ر کاتێکیش ده‌نگتان راسا و به‌رزتربێت؛ کوردسات به‌رنامه‌ی رای گشتییه‌که‌ی ناچاره‌به‌ شێوه‌یه‌کی دیموکراتیانه قسه‌یه‌کی خۆشتان له‌سه‌ر بکات!‌