پێشکه‌شه‌ به‌ هاوڕێیان قابیل و شاپور

 ئێوه‌ نامرن 

ئیوه‌ لێره‌ن

له‌ نێو بیلبیله‌ی چاوان و

له‌ شاده‌ماری خۆینمانان

له‌ نێو حه‌ز و له‌ سێبه‌ری ئاواتمانان

ئیوه‌ پێشه‌نگی کاروانن

بۆ مه‌نزڵگای خۆر ده‌چن و

ئێمه‌ش شوێن پێتان هه‌ڵده‌گرین

هه‌تا ئه‌مرین.

ئیوه‌ لێره‌ن

 له‌ نێو دڵی ئیعتراز و تێکهه‌ڵچونی ڕۆژانمانان

له‌ به‌ر سه‌رماو و

له‌ به‌ر گه‌رما و هه‌ڵقرچانی تاوه‌سانان

ئێوه‌ نامرن

ئیوه‌ لێره‌ن له‌ ژێر خێمه‌ی ئاواره‌کانی که‌رکوک و

ئه‌نفاله‌کانی گه‌رمیان و

مه‌جبور ئاواکانی شاران

له‌عه‌ره‌قه‌ی نێو چاوانی ده‌ست فرۆش و

چه‌مانه‌وه‌ی پشتمانان

له‌ برینی شه‌قار شه‌قاری ده‌ستمانان

هه‌موو شه‌وێ له‌ سه‌ر چاومان ڕاتان ده‌گرین

تا ده‌خه‌وین

ئیوه‌ لێره‌ن

له‌ قه‌ڵه‌وڵی تفه‌نگ و

له‌ سه‌نگه‌ر و

له‌ئێشکی شه‌وانمانان

له‌ نیو  بروسکی ئه‌ستێره‌ و له‌ گه‌ڵ کازێوه‌ی به‌یانان

ئێوه‌ ووشه‌ن

ئیوه‌ ڕسته‌ن له‌ کتێبی مانێڤێست و که‌پیتاڵان

ئیوه‌ لێره‌ن و نامرن

ئیوه‌ سرودی ئازادی به‌ گوێمانا ده‌چرپێنن

ئێمه‌ش هه‌موومان پیکه‌وه‌ ده‌یڵینه‌وه‌

تا ئه‌و ڕۆژه‌ی حه‌زه‌کانتان ده‌بنه‌چرای ڕۆشنی  به‌ر هه‌نگاومان

تائه‌و رۆژه‌ی  سه‌ری هه‌رچی  که‌ له‌ پوچ و هه‌رچی و په‌رچی دونیا هه‌یه‌ ده‌پێته‌ په‌یژه‌ی سه‌رکه‌وتن

ئیوه‌ نامرن

له‌ مردنیش به‌هێزترن

چونکه‌ ئیمه‌ چه‌که‌کانتان ده‌که‌ینه‌ شان

ڕێبازه‌که‌تان هه‌ڵده‌گرین وه‌ک و خۆتان

ئه‌وانه‌ش وا پێیان وایه‌ ئه‌مرن

به‌ر تیشکی خۆر

به‌ بێژنگی هه‌زار ساڵه‌ی داڕه‌زیوی دڕیو ده‌گرن!!!

ئایاری 98