لةرِؤذى دايكاندا سؤزيَك بؤ دايكم

پێشکه‌شه‌ به‌ته‌واوی دایکان

هیدایه‌ت مه‌لا عه‌لی

ژنێک نه‌رمتر له چاوی مناڵان ، ژنێک ناسکتر له‌ هه‌ست و باڵه‌ فڕی په‌پووله‌یه‌کی کانی عاشقان ، ژنێک بۆنی پڕ بوو له‌ بۆنی گوڵه‌ ساردۆنیاو ڕێحانه‌ ، ژنێک پاروی ده‌می به‌ش به‌ش ئه‌کرد له‌ دراوسێو میوانه‌کان ، ژنێک باڵای کورت بوو وه‌ک هه‌ناره‌ ووردیله‌ی ناو ئینجانه‌ ، سه‌ری به‌رز بوو وه‌ک کۆتره‌ سپی ناو هێلانه‌ ، ژنێک نه‌یئه‌زانی ئه‌لف بنووسێت به‌ڵام زمانی شیرینی ئاوپرژێنی ڕسته‌ی جوان و په‌خشانه‌ ئامۆژگاری کێڵگه‌ی ناخی ده‌کرد ، ژنێک باوه‌شی مۆڵگه‌ی میهره‌بانی و ئارامی بوو ، ژنێک نه‌یئه‌زانی مارکس له‌کوێ له‌ دایک بووه‌ به‌ڵام له‌ خوڵقیدا به‌رگری له‌ ئینسان ، له‌ ژنان ، له‌ هه‌ژارو ده‌سته‌نگان چرۆیه‌کی زیندووی هه‌بوو ، ژنێک کاتێک که‌ ژیانی باش بوو هه‌ر ئایشێ بوو ، کاتێکیش به‌ چیلکه‌چنه‌و ده‌ر‌هێنانی ناوی بسته‌ ده‌ژیا هه‌ر ئایشێ بوو، ژنێک دڵی سپی بوو وه‌ک سه‌رپۆشه‌ پاک و شۆڕبووه‌که‌ی سه‌ر شانی ، ژنێک دایک بوو به‌ مانای دایک ، دایکێک هه‌ر که‌ که‌وتمه‌ سه‌ر قاچ و چوومه‌ کۆڵان فێری کردم یاری مناڵانی تر تێک نه‌ده‌م ، دایکێک له‌ یه‌که‌م ڕۆژی خوێندنمه‌وه‌ فێری کردم که‌ قه‌ڵه‌مم دۆزیه‌وه‌ له‌ خوێندنگا بیبه‌مه‌وه‌ بۆ مامۆستا ، دایکێک فێری کردم که‌ نیوه‌ڕوان ئه‌چم بۆ دوکان و باوکم دێته‌وه‌ بۆ پشوو ده‌ست نه‌که‌م به‌ده‌خیله‌کا ، دایکێک فێری کردم چۆن ژیانم خۆش بووێت و چۆن خۆپه‌رست نه‌بم ، له‌م ژنه‌وه‌ له‌م دایکه‌وه‌ شه‌تڵی سیاسه‌ت له‌ وویژدانما ڕووا ، کاتێک ئه‌مدی ڕوبعی کاغه‌زی چوارگۆشه‌ کراوی بۆ ئابونه‌وه‌ کۆ ئه‌کرده‌وه‌ ، کاتێک زوو زوو له‌گه‌ڵ سێو چوار ژنی دراوسێدا دیار نه‌ئه‌ماو ئه‌هاته‌وه‌ ، کاتیک ده‌رزی و ده‌رمانی کۆ ئه‌کرده‌وه‌و دواتر که‌سێک ئه‌هات ئه‌یبرد ، ژنێک لێوان لێو بوو له‌ مه‌سئولیه‌ت ، پڕبوو له‌ دایکایه‌تی ، قووڵ بوو له‌ سیقه‌و ، سێبه‌رکڕ بوو وه‌ک داری گوێز، ژنێک هه‌موو که‌سی خۆش ده‌ویست ، دایکێک هه‌موو مناڵانی ئه‌لاواند ، ژنێک نموونه‌ی که‌سیه‌تی بوو له‌ خێزان و ده‌ورو به‌ردا قسه‌ی تیژ بوو له‌ڕووی سوونه‌تی لێدان و ئازاردانی ناو ماڵه‌کاندا ، دایکێک لایلایه‌و گورگانه‌ شه‌ویه‌که‌ی ئه‌یبردمه‌ ناو ده‌ریای خه‌و ئاسایشی به‌ره‌ به‌یان ، دایکێک تا ڕۆی ، تا دواجار ماڵئاوای کردو پیڵووی چاوه‌کانی لێکنا ، تا زمانی وه‌ک هه‌نگوینی بوو به‌ گڕوگاڵی دوا هه‌ناسه‌دان ، تا ده‌ستی پڕ له‌ به‌خشینی سارد هه‌ڵگه‌ڕا وه‌ک پشی ماسی ، ئه‌و دایکێک بوو په‌یامی ئیراده‌ی ئه‌گه‌یانده‌ ناخم و زۆر له‌جاران خۆشترم ئه‌ویست و ئێستاش له‌ هه‌موو کات زیاتر پێوویستم پێیه‌تی