به‌شداری كردنی هوَزان محمود له‌ زنجيره‌يه‌ک چالاکی له‌ به‌ريتانيــــــــا!

•  رۆژی 14/11 له‌سه‌ر بانگێشتی رێکخراوی لێبوردنی نێوده‌وڵاتی Amnesty International و له‌باره‌گای  لقی  Newbury ئه‌م ڕێکخراوه‌یه‌، هۆزان محمود به‌شداری کرد له سیمینارێک سه‌باره‌ت به‌ بارودۆخی سیاسی عێراق. له‌ قسه‌وباسێکدا هۆزان به‌شێوه‌یه‌کی ڕوون ئاماژه‌ی دا به بارودۆخی عێراق له‌ ژێر سایه‌ی داگیرکاری و شه‌ڕو تیرۆریزم و نه‌بوونی سه‌ره‌تایی ترین جۆره‌کانی ئاسایش و که‌می خزمه‌تگوزاریی یه‌کان. هه‌ره‌ها به‌ بارودۆخی ناهه‌مواری ژنان و ئه‌و پێشێلکاری یه‌ سیسته‌ماتیکیانه‌ی که‌ دووچاری ده‌بنه‌وه‌ و ڕاسته‌وخۆ ده‌بنه‌ هۆی پێشکاری مافه‌کانیان.

له‌شوێنێکی تری قسه‌کانیدا هۆزان ئاماژه‌ی دا به‌و هه‌وڵ و ده‌سپێشخه‌رییانه‌‌ی که‌ بۆ پێکهێنانی کۆنگره‌ی ئازادیی عێراق ‌له‌لایه‌ن کۆمه‌ڵێک هێزولایه‌ن و که‌سایه‌تی ئازادیخوازو مه‌ده‌نیی کۆمه‌ڵگه‌ی عێراقه‌وه‌ دراوه به‌مه‌به‌ستی کۆتایی پێهێنانی داگیرکاری و ده‌ستکۆتاکردنی تیرۆریزم‌. له‌کۆتایی قسه‌کانیدا له‌لایه‌ن ئاماده‌بووانی کۆڕه‌که‌وه‌ که‌له‌ چه‌ندین که‌سایه‌تی وهه‌ڵسوڕاوی سیاسی پێکهاتبوون پشتیوانی یه‌کی گه‌رم له‌قسه‌کانی هۆزان کراو هاوپشتی وهاوده‌ردی خۆیان بۆ خه‌ڵکی عێراق و خه‌باتی کۆنگره‌ی ئازادی عێراق ده‌ربڕی بۆ پێکهێنانی ده‌وڵه‌تێکی مه‌ده‌نی و سکولار.

•  بۆ رۆژی دواتر واته‌ 15.11.05 و له‌باره‌گای لقی " یۆرک، York " ی هه‌مان رێکخراو‌، واته‌ ڕێکخراوی لێبووردنی نێوده‌وڵه‌تی، هۆزان محمود بانگێشت کرا بۆ قسه‌باس کردن له‌سه‌ر بارودۆخی ژنانی عێراق و خه‌باتیان له‌ژێر سایه‌ی داگیرکاری دا.

له‌م سیمیناره‌دا هۆزان به‌شێوه‌یه‌کی روون و ئاشکرا ئه‌و پێشلکارییانه‌ی خسته‌ڕوو که‌له‌لایه‌ن هه‌ردوو‌هێز واته‌ هێزه ‌سه‌ربازی یه‌ داگیرکه‌ره‌کان و ‌هێزه‌ ئیسلامی یه‌کانه‌وه‌ دووچاری ژنان ده‌بنه‌وه، هه‌روه‌ها نه‌خشی هه‌ڵسوڕاوانی ڕێکخراوی ئازادی ژن له‌ ڕاستای به‌ره‌وپێش چوونی ئه‌م خه‌باته‌. هۆزان سه‌ره‌ڕای باسه‌که‌ی، تیشکی زیاتری خسته‌ سه‌ر بارودۆخی سیاسی عێراق و سیمای خه‌ڵکه‌که‌ی له‌ ژێر سایه‌ی شه‌ڕوداگیرکاریدا، هه‌روه‌ها هه‌وڵ و خه‌باتی خه‌ڵک له‌ڕێگه‌ی کۆنگره‌ی ئازادی عێراق که‌ ڕێکخراوی ئازادی ژنیش به‌شێکه‌ له‌ په‌یکه‌ره‌که‌ی، به‌ ئامانجی کۆتایی هينان به‌ بارودۆخی شه‌ڕو داگیرکاریی و بنیاتنانی کۆمه‌ڵگه‌یه‌کی سکولار ومه‌ده‌نی. له‌کۆتایی قسه‌کانیدا هۆزان داوای له‌ ئاماده‌بووان کرد که‌ هاووپشتی خۆیان له‌ خه‌باتی کۆنگره‌ی ئازادیی عێراق ڕابگه‌یه‌نن وسه‌رنجی راکێشان بۆ گرنگی هاوپشتی ئه‌وان له‌م ڕێکخراوه‌یه‌ وه‌ک تاکه‌ ئه‌لته‌رناتیڤی یه‌کسانخوازانه‌ بۆ بارودۆخی ئێستای عێراق.

له‌ هه‌ردوو سیمیناره‌که‌ی نیوباری و یۆرک، ئاماده‌بووان رۆشنکردنه‌وه‌کانی هۆزانیان له‌سه‌ر بارودۆخی ئێستای عێراق به‌ به‌رز نرخاندو ئاره‌زووی خۆیانیان نیشاندا بۆ یارماتی وهاوپشتیی ئه‌م پرۆژانه‌ له‌ ئایینده‌دا.

•  رۆژی 20.11 ڕادیۆی ده‌نگی ئه‌مریکا، چاوپێکه‌وتنێکی له‌گه‌ڵ هۆزان محمود ئه‌نجام دا سه‌باره‌ت به‌و گفت وگۆیانه‌ی ئێستا له‌ناو حکومه‌تی ئه‌مریکا له‌ ئارادایه‌ بۆ کێشانه‌وه‌ یان نه‌کێشانه‌وه‌ی هێزه‌ سه‌ربازی یه‌کانی‌ له‌ عێراق. هۆزان روونی کرده‌وه‌ که‌ کۆتایی هێنان به‌ داگیرکاریی به‌واتای کۆتایی هێنانه‌ به‌ به‌دبه‌ختی یه‌کانی ئێستای خه‌ڵک، له‌ پرسیارێکی تری رادیۆکه‌ که‌ ئایا کێشانه‌وه‌ی هێزه‌کانی ئه‌مریکا له‌ ئێستادا کار ناکاته‌ سه‌ر زیادبوونی کاره‌ تیرۆریستی یه‌کان ونائارامی زیاتر ناهێنێ؟ له‌وه‌ڵامدا هۆزان ووتی که‌ باروبۆخی ئێستا به‌ بوونی هێزاکانی ئه‌مریکاش ئاڵۆزتر بووه‌و ئه‌م هێزانه به‌ بوونی هێزه‌کانی پۆلیسی عێراقیش‌ تا ئێستا نه‌یانتوانیوه‌ سه‌لامه‌تی خه‌ڵک بپارێزن، هه‌روه‌ها وتی که‌ به‌ پێچه‌وانه‌وه‌ بوونی هێزه‌ داگیرکه‌ره‌کان زه‌مینه‌و کرده‌وه‌ تیرۆریستی یه‌کانی گروپه‌ ئیسلامی یه‌کانی زیاتر کردووه‌ و ئه‌وان پاساوی تیرۆریستیی خۆیان له‌ بوونی هێزه‌کانی ئه‌مریکا له‌ ناوچه‌که‌دا ده‌ده‌نه‌وه‌.

کوَ نگره‌ی ئازاديي عيَراق / ميديا سه‌نته‌ر

ريَکخراوی ئازادی ژن له‌ عيَراق / به‌ريتانيا

20.11.2005‌